اردو افسانہ

افسانہ "بے بسی، بے چارگی، درماندگی"

"ساجد خان حویلیاں" پاکستان "

▪▪٭٭٭٭٭٭٭٭٭٭٭٭٭٭٭٭٭٭٭٭٭٭٭▪▪

مجلس میں صاحبانِ علم و فراست جلوہ افروز تھے۔۔۔ان کی ذہانت اور علمی وقار ان کے چہروں کی بشاشت اورسکون سے عیاں تھا۔۔نپے تلے الفاظ اور فصیح و بلیغ جملوں کا تبادلہ ہو رہا تھا۔۔۔مگریہ مسئلہ ر ائے آتے ہی مزید الجھاؤ کا شکار ہو رہا تھا۔۔۔ان میں کئی ایسے صاحبانِ فکرونظر تھے جنہوں نے علم و ادب کی معتبر، ضخیم اور اہم ترین کتب کھنگال رکھی تھیں۔۔۔مشرق و مغرب کے علوم سے بہرہ مند تھے۔۔۔مگر اس مسئلہ پہ وہ بھی اُلجھاو کا شکار تھے۔۔۔

دُنیاکے برِ اعظم، برِ اعظموں میں تقسیم ممالک، ممالک میں تقسیم ہر نوع کا علم۔۔۔مگراس مسئلہ پر سب خاموش۔۔۔ 

بے بسی۔۔۔بے چارگی۔۔۔درماندگی نے ڈیرے ڈالنے شروع کر دئیے۔۔۔

’’ سب فانی ہے‘‘۔۔۔ پہلے نے ہتھیار پھنک دئیے۔۔۔

’’ مگر وہ فانی نہیں، ابدی ہے‘‘۔۔۔سامنے بیٹھے نے احتجاج کیا۔

’’ ابدی کیسے۔۔؟؟۔۔۔نہ ٹھکانے کا پتہ نہ مسکن کا تعین۔۔؟؟؟

پہلے نے قدرے بلندی سے آواز کا پتھر لڑھکایا۔۔۔

کچھ دیر کے لئے خاموشی اِن سب کے سامنے بھنگڑا ڈالے رہی ۔۔۔مگر وہی۔۔!۔۔بے بسی ۔۔۔ بے چارگی۔۔۔ درماندگی!!!!!!

کونے میں بیٹھا بحث میں شامل ہوا۔۔۔انسان تعاقب نہیں کر سکتا وہ تو اُس نوالے کا تعاقب کرنے سے قاصر ہے جو وہ اپنے ہاتھ سے اپنے حلق سے نیچے اتارتا ہے‘‘۔

وہ کہاں سے آیا؟؟؟

کن ہاتھوں نے مس کیا؟؟؟

کب بکھرا ۔۔۔کیسے بکھیرا ۔۔۔کہاں بکھرا۔۔۔

کن ہاتھوں سے بکھرا۔۔۔؟؟؟

کس مٹی نے کوکھ میں لیا۔۔۔؟؟؟۔۔۔

کس بوند نے زندگی سے ہمکنار کیا۔۔۔؟؟؟

کس اوزار سے کٹا۔۔۔؟؟؟۔۔۔کس نے پیسا۔۔۔؟؟؟

کس نے اٹھایا۔۔۔؟؟؟۔۔کدھر لے گیا۔۔۔؟؟۔۔۔ کہاں لے کر گیا۔۔۔؟؟

کس نے باندھا۔۔۔؟؟۔۔۔ کیسے باندھا۔۔۔ ؟؟۔۔۔کہاں بندھا۔۔۔؟؟

کس نے خریدا۔۔۔ کونسا خریدا۔۔۔کہاں سے خرید۔۔۔؟؟

کس نے پہنچایا۔۔۔کہاں پہنچایا۔۔۔کیسے پہنچایا۔۔۔؟؟

کس نے گوندھا۔۔۔ کس نے پکایا۔۔۔ 

کون کھائے گا اور کب کھائے گا؟؟؟

وہ جو کافی دیر سے خاموش ،گم سم اوراپنے خیالوں میں کھویا ہوا تھا۔۔۔کونے والے کو غور سے دیکھنے لگا۔۔۔!!!

چاروں طرف سے بے ہنگم سا شور اٹھا۔۔۔اور اٹھتے ہی اچانک خاموشی پھیل گئی‘‘۔۔۔دائیں طرف بیٹھا شخص کچھ کہنے کو تھا۔۔۔کہ پہلے نے پھر اپنی بات دُھرائی۔۔۔ وہ مصرتھا کہ’’سب فانی ہے‘‘

ایک جانب سے آواز آئی۔۔۔’’ابدی ہے‘‘ ۔۔۔

دُوسری طرف سے’’ فانی ہے ‘‘ 

بے ربط آوازیں کمرے میں گونج گئیں۔۔۔

فیصلہ کیسے ہو۔۔۔؟؟۔۔۔فیصلہ کون کرے۔۔۔؟؟

حل نہیں مل رہا۔۔۔کوئی فیصلہ کن دلیل نہیں آ رہی تھی۔۔۔ سبھی الجھاؤ کا شکار۔۔۔ خاموشی نے کھتک ناچ شروع کر دیا۔۔۔

’’ سمندر میں سکوت اور وقار ہے ‘‘۔۔۔ 

’’ندی میں شور او ر چھچھورا پن‘‘۔۔۔

اُس نے پہلی بار زبان کھولی تھی ۔۔۔مگر اُس کی تاک میں بیٹھا شخص بھلا کب چوکنے کے حماقت کرتا۔۔۔

اس نے بات کاٹتے ہوئے کہا۔۔۔

’’ مگر سمندر بھی تو انہی ندیوں کے ہونے سے سمندر ہے‘‘۔۔۔

ندیاں نکال دو۔۔۔ سمندرکہاں۔۔۔؟؟؟

قطرے کی کیا اوقات۔۔۔کہ اُس میں دجلہ دکھائی دے؟؟؟

اس نے فورا پینترا بدلا۔۔۔

ہاہاہا۔۔ عجیب بات کرتے ہو صاحب۔۔۔ ! 

سمندر سے سارے قطرے نکال دو۔۔۔پھر سمندر کہاں۔۔۔ ؟؟

اب کے تاک میں بیٹھا زِیرلب مسکرایا۔۔۔

دائیں جانب بیٹھا آخرکہہ اٹھا ’’ ہم نجانے کن مسائل میں بھٹک رہے ہیں۔۔۔سب کہتے ہیں پڑھو۔۔۔ مگر کیا پڑھیں۔۔۔

اسلامیات،سیاسیات، معاشیات، طبیعات،عمرانیات،فلکیات؟؟؟‘‘

ان سے کچھ فاصلے پر گہری سوچ میں ڈوبے شخص نے احتجاج کا پتھر لڑھکایا۔۔۔پڑھتے نہیں تو پھر فن سیکھو۔۔۔

’’فن ۔۔۔کونسا فن۔۔؟؟۔۔۔ وہ تو دھوکا ہے‘‘

کیا فن نہیں پڑھا جاتا۔۔۔؟؟؟ سامنے بیٹھے نے احتجاج کی چوٹ سہلاتے ہوئے رائے دی۔۔۔’’ 

یہ نہیں کرو گے تو وہ ہو گا۔۔۔ ایسا نہ ہوا تو ویسا ہو گا۔۔۔

سب جھوٹ! ۔۔۔نرا جھوٹ ۔۔۔سفیدجھوٹ ۔۔۔ ننگا جھوٹ۔۔۔

مضبوط بنانا، درمیان سے اُٹھانا، ذرہ ہٹ کے تھوڑا اُونچا۔۔۔قدرے کشادہ۔۔۔ورنہ خوبصورت نہیں دِکھے گا۔۔۔یہ سب ذہنی اختراعات ہیں۔۔۔جن کی کوئی اصل نہیں‘‘۔۔۔وہ سب کو گھورتے ہوئے بے محابا کئے جا رہا تھا۔۔۔۔۔۔۔۔۔۔۔۔

سمندر کی خاموشی، خاموشی میں پراسراریت، پراسراریت میں انجانا خوف۔۔۔ خوف میں سسکتے لمحے۔۔۔لمحوں میں گزرتا وقت۔۔۔ وقت کیا ہے۔۔۔؟؟؟۔۔۔کوئی بتائے تو۔۔۔؟؟

محض ایک گورکھ دھندہ۔۔۔جویہاں کچھ ہے وہاں کچھ۔۔۔

یہاں ایسے جیسے ہاتھ سے پھسلتی ریت۔۔۔ !!!

چھوڑو اس بحث کواس کا حاصل کچھ نہیں۔۔۔ بائیں طرف بیٹھا ہکلاتے ہوئے کہنے لگا۔۔۔اچھا اس کا بتاؤ ۔۔۔

وہ کہاں ہے۔۔۔؟؟؟۔۔۔وہ ’’وہ" تو مر چکا ہے‘‘

’’ ہائیں! کب؟ کہاں۔۔۔ کیسے؟؟‘‘ جواب سنتے ہی افسردگی اس کے چہرے پر چھا گئی۔۔۔نہیں جناب۔۔۔!! 

وہ مرا نہیں وہ تو زندہ ہے۔۔۔ البتہ اس کا جسم اوجھل ضرور ہو چکا ہے‘‘۔۔۔ہاں!۔۔۔ ’’قاعدہ یہی ہے۔۔۔پیدا ئش۔۔۔بڑھوتری۔۔۔ جوانی۔۔۔ بڑھاپا اور پھر سفر۔۔۔ کوئی قدرے شروع میں۔۔۔ کوئی درمیان سے تو کوئی آخر پر۔۔۔یہ سفر ضرورشروع کرتا ہے۔۔۔

سب وقت کا گورکھ دھندہ اور لکھے کا کیا دھرا ہے میاں۔۔۔

سمندر کی بابت بات کرنے والا شخص چہکا۔۔۔

’’ تم تو پاگل ہو‘‘اس نے بحث سمیٹے ہوئے کہا۔۔۔

میں’’ میں پاگل نہیں۔۔۔ میں حقیقت پسند ہوں۔۔۔

میں نے اپنے باپ کی نصیحت پر عمل کیا ہے حضور! والد نے مجھے یہی سمجھایا تھا کہ بیٹا علم میں عظمت ہے۔۔۔کتاب اصل دوست ہے۔۔۔میں نے کتابیں تھامیں۔۔۔ علم حاصل کیا اور بے موت مار دیا گیا۔۔۔آج سب مجھ پر نوحہ کناں ہیں۔۔۔ 

کیا اپنے کیا بیگانے۔۔۔‘‘

تم جھوٹ بول رہے ہو۔۔۔تم نے علم سیکھا ہی نہیں۔۔۔ تم دنیا داری میں غرق رہے ہو۔۔۔صرف نام و نمود کی خاطر۔۔۔ اپنی ذات میں گم۔۔۔ تم تواپنے ہی حصار کے قیدی رہے ہو۔۔

‘‘سامنے والے نے جھنجھناہٹ سے کہا۔۔۔

نہیں نہیں۔۔۔یہ مجھ پہ الزام ہے۔۔۔ جھوٹ ہے۔۔۔سارا جھوٹ۔۔۔میں وقت کو نہیں مانتا۔۔۔یہ گورکھ دھندہ ہے۔۔۔جسم کی کوئی حیثیت نہیں۔۔۔ ’’یہ فانی ہے‘‘’میں ابدی ہوں‘‘وقت کی قیدسے آزاد۔۔۔بس بس’’ تمہارا دماغ چل گیا ہے۔۔۔ تم سے پوچھا کچھ جاتا ہے۔۔۔ تم جواب کچھ دیتے ہو۔۔۔ جاؤ۔۔۔ اپنے خبط کا علاج کراؤ‘‘۔۔۔داہیں طرف بیٹھا اب کے برس پڑا۔۔۔

’’ ہاہاہا۔۔۔ کس سے۔۔؟؟۔۔معالج سے۔۔۔وہ تو مفروضوں پہ مبنی علم کے زور پر علاج کرتا ہے۔۔۔ جو اصل نہیں فرع ہے۔۔۔جبکہ میں اصل کی تلاش میں ہوں۔۔۔ مجھے اصل نہیں مل رہی‘‘

جب اصل ملے گی تو یہ علاج بھی بے معنی ہونگے’’اس نے بے تابی سے کہا۔۔۔تم بے چین ہو۔۔۔اضطراب تمہارے وجود میں سرایت کر چکا ہے۔۔۔عقل سے کام نہیں لیتے۔۔۔علم پہ تمہارا عمل نہیں۔۔۔جاؤ اسے ڈھونڈو اصل مل جائے گا‘‘

داہیں طرف بیٹھے نے بے ساختگی سے کہا۔۔۔ 

اسے ڈھونڈوں ۔۔۔؟؟۔۔کہاں ڈھونڈوں۔۔۔؟؟ 

اب کے وہ اُسے غور سے دیکھنے لگا۔۔ 

مخلوق کی محبت میں۔۔داہیں طرف بیٹھے نے جواب دیا۔۔۔

محبت۔۔۔ محبت تو کہیں بھی نہیں جناب۔۔۔ اِس لفظ کوآپ لوگوں نے اتنا گھسیٹا کہ اس کی حرمت ہی ختم ہو چکی ہے۔۔۔جب حرمت ختم ہو جائے تو اثرات بھی نہیں رہتے اور میں بے اثر اور بے روح چیزوں کو پسند نہیں کرتا۔۔۔ 

میں صرف اصل کا سراغ چاہتا ہوں۔۔۔اصل کو پا لینے کے لئے مجھے اب کسی جزو میں بھی نہیں پڑنا‘‘۔

’’ خدا کے لیے اب خاموش ہو جاؤ! ‘‘سامنے بیٹھے نے التجا کی میں خاموش نہیں رہوں گا۔۔۔میں سب کو بتاؤنگا کہ سب نقلی ہے۔۔۔یہ وقت بھی ایک گورکھ دھندہ ہے جو طے ہے اُسے وقت میں مقید کرنے کا کیا فائدہ۔۔۔جب میرے دانت نکلے تو کتنے مضبوط تھے۔۔۔ دیکھو غور سے دیکھو۔۔۔آج یہ ٹوٹ رہے ہیں ۔۔۔یہ میرے بال دیکھو۔۔۔لمبے گھنگھریالے تھے آج یہ جھڑ رہے ہیں۔۔میرا توانا اور مضبوط جسم ڈھیلا اورکمزور ہو چکا

۔۔میری بینائی۔۔۔آہ۔۔!۔۔آج دھندلا رہی ہے۔۔۔ سب نقلی ہے۔۔۔ 

وہ بھی اور یہ بھی۔۔۔طے شدہ کو وقت کالبادہ دے دیاگیا۔۔۔ میں نے نقل کے ساتھ زندگی گزاردی۔۔۔اصل کا پتہ ہی نہ چلا۔۔۔وہ بے تھکان بولے جا رہا تھا۔۔ساری کتابیں۔۔۔سارے علوم۔۔۔سارے فنون۔۔۔بھی تو اصلی نہیں۔۔۔ اصل کیا ہے۔۔۔؟؟؟

وہ سوالات کرنے لگا جو کچھ دیر پہلے تمسختراڑارہاتھا۔۔۔ ہاہاہا۔۔!!۔۔۔اصل صرف وہ ہے۔۔جسے کوئی ڈھونڈتا نہیں۔۔۔ 

اُسے پالو گے تو سمجھو اصل تمھیں مل گیا۔۔۔تم سارے صرف اس کے پھیلائے میں گم ہو۔۔۔میں آج بھی اُسے ہی ڈھونڈ رہا ہوں۔۔۔کبھی اپنے اندر کبھی اپنے باہر ۔۔۔تم بھی اُسے ڈھونڈو۔۔تمہیں پتہ چل جائے گا کہ اصل کیا ہے۔۔۔؟؟۔۔۔نقل کیا ہے۔۔؟؟‘‘

میں وہاں جھانکا ہوں وہاں ایک وسیع دُنیا آباد ہے میں اُس دُنیا کو دیکھ کرحیران ہو گیا ہوں۔۔۔میں نے دریافت توکرلی پر شناخت نہیں کر پا رہا تم بھی اُسے ڈھونڈو۔۔۔

وہاں تم نے کیا دِیکھا ازرائے مذاق اُس نے پوچھا۔۔۔

وہاں۔۔۔وہاں صر ف زبر۔۔زیر۔۔۔اور پیش ہے۔۔۔جوان کو سمجھ گیا۔۔۔جزم اُس نے اپنالی۔۔۔پھرتشدیدنے اُسے اپنے ساتھ جوڑلیا۔۔۔

اوہو۔۔۔ شاہدتم نے اپنی روح دیکھ لی ہوگی سامنے بیٹھا تمسخراڑاتے ہوئے کہنے لگا۔۔۔

نہیں نہیں ۔۔۔یہ روح نہیں کئی اجسام ہیں۔۔۔تم نے اصل پانا ہے تو پہلے نکتے کو ڈھونڈو۔۔۔نکتہ وسیع دنیا میں ایک نقطے کے برابرہے۔۔۔اُسی نکتے میں طاقت کے سارے سرچشمے ہیں۔۔۔وہاں ارتعاش ہے۔۔۔حرکت ہے۔۔۔آندھیوں کی طر ح تیز ہوائیں ہیں ۔۔۔اُن میں آوازوں کی بازگشت ہے۔۔۔ آوازوں کوسنو۔۔۔

تب جان جاؤگے۔۔۔ اصل کیا ہے۔۔۔‘‘

’’تم جس پائیداری کی باتیں کرتے ہو وہ فانی ہیں‘‘۔

’’ کیا تم نے وہ دیکھا۔۔۔جو جسم سے نکل کے ہوا کے دوش پر نجانے کدھر چلا گیا تھا اور تم۔۔۔تم سارے فرع کو دیکھ کر چلائے جا رہے تھے اور مسلسل چلائے جارہے ہو‘‘

’’ تم مانتے ہی نہیں‘‘ تم ایسے ہی چلاتے رہو گے۔۔۔جب اصل ملے گا۔۔تب سکون اورٹھہراؤ پاؤ گے۔۔۔’’ تمہاری دسترس میں اتنا ہی ہے جتنا تمہیں ودیعت کیا گیا‘‘۔۔۔ 

اسکے آگے الجھاؤ ہے۔۔"بے بسی ہے" بے چارگی ہے"درماندگی ہے۔۔۔اصل تک رسائی سے سب قاصر ہیں۔۔۔قاصر ہیں۔۔۔قاصر ہیں۔۔۔وہ دیوانہ وار جھومنے لگا۔۔۔سب آنکھیں پھاڑے اُسے دیکھے جا رہے تھے۔۔